SvJazep.org - Вітаем на старонцы парафіі праведнага Язэпа (г.Менск)!

ТРАПАРЫЁН

Нядзеля Ўсіх Сьвятых беларускіх (2-я нядзеля пасьля Пяцідзесятніцы)

Трапар нядзельны (Тон 1) Хоць юдэі запячаталі магільны камень і жаўнеры сьцераглі ўсячыстае цела Тваё, Ты ўваскрос на трэці дзень, Хрысьце Спасе, даруючы сьвету жыцьцё. Дзеля гэтага сілы нябесныя ўсклікнулі Табе, Жыцьцядаўча: Слава ўваскрасеньню Твайму, Хрысьце, слава валадарству Твайму, слава провіду Твайму, адзіны Чалавекалюбча.

Кандак (Тон 1) Ты, Божа, уваскрос з магілы ў славе і сьвет уваскрасіў з сабою; род людзкі Цябе славіць, як Бога, і сьмерць згінула; Адам, Уладару мой, радуецца, і Эва, вызваленая ад путаў, цешыцца і кліча: “Ты, Хрысьце, той, які дае ўсім уваскрасеньне” .

Нядзеля Ўсіх Сьвятых

Трапар нядзельны (Тон 8) Ты зышоў з вышыні, Міласэрны, пахаваньне прыняў трохдзённае, каб нас вызваліць ад цярпеньняў. Жыцьцё нашае і ўваскрасеньне, Госпадзе, слава Табе!

Трапар усім сьвятым (Тон 4) Быццам у пурпуру і кужаль, Царква Твая аздобілася крывёю тых, што па ўсім сьвеце былі сьведкамі Табе, Хрысьце Божа, і праз іх моліць Цябе: даброты Твае людзям Тваім зышлі, даруй супакой усяму сьвету і душам нашым багацьце Твайго зьмілаваньня.

Кандак усім сьвятым (Тон 8) Як першыя плады стварэньня, сусьвет прыносіць Табе, Госпадзе і Творча ўсіх, баганосных мучанікаў: малітвамі іх і Багародзіцы захавай у глыбокім спакоі Царкву Тваю і людзей Тваіх, Шматміласэрны.

Нядзеля Зыходу Сьвятога Духу

Трапар (Тон 8) Блаславёны Ты, Хрысьце Божа наш, што рыбакоў напоўніў мудрасьцю, паслаўшы ім Духа Сьвятога, і праз іх улавіў увесь сусьвет. Чалавекалюбча, слава Табе.

Кандак (Тон 8) Калі Ўсявышні, зышоўшы, мовы зьмяшаў, Ён разьдзяліў між сабой народы; калі ж паслаў вогненныя языкі, да еднасьці ўсіх паклікаў. Дзеля гэтага мы ўсе згодна славім Усесьвятога Духа

Нядзеля Айцоў Першага Сусьветнага Сабору

Трапар нядзельны (Тон 6) Угледзеўшы анёлаў на магіле Тваёй, вартаўнікі амярцьвелі; і, стоячы ля магілы, Марыя шукала ўсячыстае цела Тваё. Ты паланіў пекла, застаўшыся некранутым ім, выйшаў сустрэць дзеву, даючы Жыцьцё. Госпадзе, што ўваскрос з мёртвых, слава Табе!

Трапар Узьнясеньня (Тон 4) Узьнёсься Ты ў славе, Хрысьце Божа наш, узрадаваўшы вучняў Тваіх абяцаньнем Сьвятога Духа, і ўмацаваўшы іх Тваім блаславеньнем, бо Ты – Сын Божы, Збавіцель сьвету.

Трапар Айцоў (Тон 8) Ты бясконца слаўны, Хрысьце Божа наш, бо ўстанавіў Айцоў нашых сьветачамі на зямлі, і праз іх прывёў нас да веры праўдзівай. Усеміласэрны Госпадзе, слава Табе.

Кандак Айцоў (Тон 8) Апосталаў прапаведаваньне і Айцоў навучаньне ўмацавалі веру праўдзівую ў Царкве, і яна, апрануўшыся ў шаты праўды, вытканыя з нябеснага багаслоўя, праўдзіва выясьняе і славіць набожнасьці вялікую тайніцу.

Кандак Узьнясеньня (Тон 6) Споўніўшы справу нашага збаўленьня і зьяднаўшы зямное з нябесным, Ты ўзьнёсься ў славе, Хрысьце Божа наш, не адлучыўшыся ад нас, але неразлучна прабываючы з намі і кажучы тым, што любяць Цябе: “ Я з вамі, і ніхто ня зможа нічога супраць вас”.

Нядзеля Сьлепанароджанага

Трапар нядзельны (Тон 5) Слова спрадвечнае з Айцом і Духам, ад Дзевы народжанае для збаўленьня нашага, усхвалім, верныя, і паклонімся Яму: бо Ён захацеў дабравольна целам узысьці на Крыж і сьмерць пацярпець, і ўваскрасіць памерлых слаўным уваскрасеньнем сваім.

Кандак сьлепанароджанага (Тон 4) З асьлеплымі вачыма душы маёй да Цябе прыходжу, Хрысьце, і як некалі сьлепанароджаны, каюся і клічу: “Ты – сьвятло тых, што ў цемры”.

Кандак велікодны (Тон 8) Хоць Ты, Несьмяротны, і зышоў у магілу, Ты зьнішчыў пекла ўладу і ўваскрос пераможна, Хрысьце Божа, жанчынам-міраносіцам кажучы: “Радуйцеся!”, і Тваім апосталам супакой даруючы, Ты, што даеш памерлым уваскрасеньне.

Нядзеля самаранкі

Трапар нядзельны (Тон 4) Сьветлую вестку аб уваскрасеньні і аб адмене прадзедаўскага асуджэньня ад анёла пачуўшы, Гасподнія вучаніцы апосталам з радасьцю сказалі: “Сьмерць пераможаная, Госпад Бог уваскрос, даруючы сьвету багацьце свайго зьмілаваньня”.

Трапар Перапалаўленьня (Тон 8) У палове сьвята сасьмяглую душу маю вадою набожнасьці напаі, Збавіцелю, бо Ты ж некалі ўсклікнуў да ўсіх: “Хто мае смагу, хай прыходзіць да Мяне і п'е”. Крыніца жыцьця нашага, Хрысьце Божа, слава Табе.

Кандак самаранкі (Тон 8) Прыйшоўшы з вераю да студні, Самаранка ўбачыла Цябе, мудрасьці Крыніцу, і напіўшыся з яе ўдосталь, атрымала ў спадчыну вечнае валадарства і непрамінальную славу.

Кандак Паловы сьвята (Тон 4) Калі настала палова законнага сьвята, Ты, Творча ўсяго і Ўладару, Хрысьце Божа, сказаў прысутным: “Хадзіце, зачэрпніце вады несьмяротнасьці”. Таму вось і мы прыходзім да Цябе і даверліва клічам: “Даброты Твае даруй нам, бо Ты – Крыніца жыцьця нашага”.

Нядзеля расслабленага

Трапар нядзельны (Тон 3) Хай весяліцца неба, хай радуецца зямля, бо Госпад паказаў моц рукі сваёй, сьмерцю зьнішчыўшы сьмерць: Ён, першынец з мёртвых, нас выбавіў з пякельнай бездані і дараваў сьвету багацьце свайго зьмілаваньня.

Кандак расслабленага (Тон 3) Душу маю, дашчэнту зьнясіленую ўсякімі грахамі і благімі ўчынкамі, узьнімі Тваім Боскім заступніцтвам, Госпадзе, як Ты некалі ўзьняў расслабленага; каб я, будучы збаўленым, мог усклікнуць Табе: слава, міласэрны Хрысьце, уладзе Тваёй.

Нядзеля міраносіцаў

Трапар нядзельны (Тон 2) Калі Ты зышоў да сьмерці, Жыцьцё несьмяротнае, Ты зьнішчыў пекла зьзяньнем Боскасьці Тваёй; калі ж Ты і памерлых з апраметнай уваскрасіў, усе сілы нябесныя ўсклікнулі: “Жыцьцядаўча Хрысьце Божа наш, слава Табе!”

Трапар Язэпа (Тон 2) Высакародны Язэп зьняў з дрэва ўсячыстае цела Тваё і, спавіўшы яго ў чыстае палатно з духмянасьцямі, у магіле новай паклаў.

Трапар (Тон 2) Анёл зьявіўся ля магілы жанчынам-міраносіцам і ўсклікнуў: “Алейкі мёртвым патрэбныя, Хрыстос жа тленнасьці не зазнаў. Дык усклікніце: Уваскрос Хрыстос, даючы сьвету багацьце свайго зьмілаваньня”.

Кандак міраносіцаў(Тон 2) Сказаўшы міраносіцам: “Радуйцеся!” – Ты суняў плач прамаці Эвы ўваскрасеньнем Тваім, Хрысьце Божа, і апосталам Тваім загадаў прапаведаваць: “Збаўца ўваскрос з магілы”.

Нядзеля Тамаша (Антыпасха)

Трапар (Тон 7) Хоць магіла была запячатаная, Ты, Хрысце Божа, зазьяў з магілы; і хоць дзьверы былі зачыненыя, Ты, Уваскрасеньне ўсіх, прыйшоў і стаў сярод вучняў Тваіх, абнаўляючы ў нас праз іх дух правы ў вялікай міласэрнасьці Тваёй.

Кандак (Тон 8) Дапытліваю рукою Тамаш дакрануўся да жыцьцядайнага боку Твайго, Хрысьце Божа, калі Ты ўвайшоў праз зачыненыя дзьверы, і разам з іншымі апосталамі ўсклікнуў Табе: “Ты – Госпад мой і Бог мой!”

Шостая нядзеля Вялікага Посту. Уваход Госпада нашага Ісуса Хрыста ў Ерусалім (Вербніца)

Трапар першы (тон 1) Каб перад мукаю Тваёю ўпэўніць нас у агульным уваскрасеньні, Ты, Хрысьце Божа, узьняў з мёртвых Лазара. Дзеля гэтага мы, як некалі дзеці, трымаем знакі перамогі і Табе, Пераможцу сьмерці, радасна ўсклікаем: “Гасанна на вышынях, блаславёны Той, хто прыходзіць у імя Гасподняе!”

Слава...: Трапар другі (тон 4) Пахаваныя з Табою ў хрышчэньні, мы ўдастоіліся вечнага жыцьця ва ўваскрасеньні Тваім, Хрысьце Божа наш, і таму сёньня прыносім Табе песьню хвалы: “Гасанна на вышынях, блаславёны Той, хто прыходзіць у імя Гасподняе!”

Цяпер...: Кандак (тон 6) Хрысьце Божа, што сядзіш на пасадзе ў нябёсах, на зямлі, сеўшы на жарабя, Ты прымаеш хваленьне анёлаў і песьні дзетак, якія ўсклікаюць Табе: “Гасанна на вышынях, блаславёны Той, хто прыходзіць Адама паклікаць”!

Пятая нядзеля Вялікага Посту

Трапар нядзельны належнага тону (Тон 8) Ты зышоў з вышыні, Міласэрны, пахаваньне прыняў трохдзённае, каб нас вызваліць ад цярпеньняў. Жыцьцё нашае і Ўваскрасеньне, Госпадзе, слава Табе.

Трапар Марыі (Тон 3) У Табе, Маці, верна захаваўся вобраз Божы: узяўшы крыж, ты пайшла ўсьлед за Хрыстом і на справе навучала не клапаціцца аб целе, бо яно прамінае, але дбаць пра душу, рэч несьмяротную. Дзеля гэтага разам з анёламі радуецца, сьвятае Марыя, дух твой.

Кандак Марыі (Тон 3) Грахамі ўсякімі раней перапоўненая, ты, пакаяўшыся, сталася нявестай Хрыстоваю і, пераймаючы анёльскае жыцьцё, дэманаў перамагаеш зброяй крыжоваю. Дзеля гэтага ты цяпер – нявеста ўладарства, Марыя слаўная.

Кандак Багародзіцы (Тон 8) Магутная Ўладарка Багародзіца, мы, верныя слугі Твае, выбаўленыя табою ад бедаў, песьні ўдзячнасьці і перамогі Табе прыносім. Ты ж, маючы сілу непераможную, ад усякіх напасьцяў выратуй нас, каб нам усклікнуць табе: “Радуйся, дзева Маці!”

Чацьвертая нядзеля Вялікага Посту. Успамін сьвятога айца нашага Яна Лесьвічніка. (2 сакавiка)

Трапар нядзельны належнага тону. (Тон 7) Ты зьнішчыў Крыжам Тваім сьмерць, адчыніў разбойніку рай, міраносіцам плач на радасьць перамяніў і апосталам загадаў прапаведаваць, што Ты ўваскрос, Хрысьце Божа, даруючы сьвету багацьце Твайго зьмілаваньня.

Трапар сьвятога (Тон 1) Пустыні жыхаром, анёлам у целе і цудатворцам зьявіўся ты, баганосны ойча Яне: пастом, нядрэмнасьцю і малітваю нябесныя дараваньні прыняўшы, аздараўляеш нядужых і душы тых, што з вераю прыходзяць да цябе. Слава Таму, хто даў табе сілу; слава Таму, хто ўзьвялічыў цябе; слава Таму, хто праз цябе дае ўсім аздараўленьні.

Кандак сьвятога (Тон 4) На вышыні ўстрыманасьці Госпад паставіў цябе, настаўніку Яне, ойча наш, быццам зорку ясную, што прасьвятляе ўвесь сьвет.

Кандак Багародзіцы (Тон 8) Магутная Ўладарка Багародзіца, мы, верныя слугі Твае, выбаўленыя табою ад бедаў, песьні ўдзячнасьці і перамогі Табе прыносім. Ты ж, маючы сілу непераможную, ад усякіх напасьцяў выратуй нас, каб нам усклікнуць табе: “Радуйся, дзева Маці!”

Трэцяя нядзеля посту. Пакланеньне сьвятому і жыццядайнаму Крыжу. (24 лютага 2008г.)

Трапар нядзельны адпаведнага тону (Тон 6) Угледзеўшы анёлаў на магіле Тваёй, вартаўнікі амярцьвелі; і, стоячы ля магілы, Марыя шукала ўсячыстае цела Тваё. Ты паланіў пекла, застаўшыся некранутым ім, выйшаў сустрэць дзеву, даючы Жыцьцё. Госпадзе, што ўваскрос з мёртвых, слава Табе!

Трапар Крыжа (Тон 1) Збаў, Госпадзе, людзей Тваіх і блаславі набытак Твой; даруй супакой сьвятой Тваёй Царкве і перамогу над усімі нягодамі, і захавай верны Твой народ сілаю Твайго крыжа.

Кандак Крыжа (Тон 7) Ужо вогненны меч не сьцеражэ больш варотаў райскіх, бо яго патушыла дрэва крыжовае, якім джала сьмерці і перамога пекла зьнішчаныя былі, і Ты, Спасе, зьявіўся тым, што ў апраметнай, кажучы: “Хадзеце зноў у рай.”

Другая нядзеля посту. (17 лютага 2008г.)

Трапар нядзельны належнага тону (Тон 5) Слова спрадвечнае з Айцом і Духам, ад Дзевы народжанае для збаўленьня нашага, усхвалім, верныя, і паклонімся Яму: бо Ён захацеў дабравольна целам узысьці на Крыж і сьмерць пацярпець, і ўваскрасіць памерлых слаўным уваскрасеньнем сваім.

Кандак Другой нядзелі (Тон 4) Сёньня час дзеяньня настаў, бо суд ужо пры дзьвярох, дык устанем усе, хто посьціць, падмацуем сьлёзы пакаяньня міласьцінамі і ўсклікнем: “Грахі нашыя больш шматлікія за пясок марскі, але Ты, Творча ўсіх, адпусьці нам, каб мы маглі атрымаць вянцы несьмяротнасьці”.

Кандак Багародзіцы (Тон 8) Магутная Ўладарка Багародзіца, мы, верныя слугі Твае, выбаўленыя Табою ад бедаў, песьні ўдзячнасьці і перамогі Табе прыносім. Ты ж, маючы сілу непераможную, ад усякіх напасьцяў выратуй нас, каб нам усклікнуць Табе: “Радуйся, Дзева Маці!”

Першая нядзеля посту. Нядзеля праваслаўя (10 лютага 2008г.)

Трапар нядзельны належнага тону (Тон 4) . Сьветлую вестку аб уваскрасеньні і аб адмене прадзедаўскага асуджэньня ад анёла пачуўшы, Гасподнія вучаніцы апосталам з радасьцю сказалі: “Сьмерць пераможаная, Госпад Бог уваскрос, даруючы сьвету багацьце свайго зьмілаваньня”.

Трапар Нядзелі Праваслаўя (тон 2). Усячыстаму вобразу Твайму пакланяемся, Добры, просячы дараваньня правінаў нашых, Хрысьце Божа, бо Ты захацеў дабравольна целам узысьці на крыж, каб вызваліць стварэньне Тваё з варожай няволі. Дзеля гэтага мы з удзячнасьцю ўсклікаем Табе: Ты напоўніў радасьцю ўсё, Збавіцелю наш, прыйшоўшы збавіць сьвет.

Кандак Нядзелі Праваслаўя (тон 8). Незьмяшчальнае Айцовае Слова зьмясьцілася ў целе, узятым ад Цябе, Багародзіца, і апаганены вобраз вярнула да ранейшага стану, злучыўшы яго з Боскай красой. Дзеля гэтага мы вызнаем збаўленьне нашае словам і на справе, і прадстаўляем Яго на іконе.

Кандак Багародзіцы (тон 8). Магутная Ўладарка Багародзіца, мы, верныя слугі Твае, выбаўленыя табою ад бедаў, песьні ўдзячнасьці і перамогі Табе прыносім. Ты ж, маючы сілу непераможную, ад усякіх напасьцяў выратуй нас, каб нам усклікнуць табе: “Радуйся, дзева Маці!”

Нядзеля прабачэньня (3 лютага 2008г.)

Трапар нядзельны належнага тону (Тон 3) . Хай весяліцца неба, хай радуецца зямля, бо Госпад паказаў моц рукі сваёй, сьмерцю зьнішчыўшчы сьмерць: Ён, першынец з мёртвых, нас выбавіў з пякельнай бездані і дараваў сьвету багацьце свайго зьмілаваньня.

Кандак (тон 6). Праваднік мудрых, падаўца розуму, неразумных настаўнік і бедных апякун, умацуй і настаў на розум сэрца маё, Уладару; дай мне слова, Айцовае слова, не магу ўстрымаць вуснаў маіх, каб ня клікаць: “Зжалься нада мною, Міласэрны, бо гіну!”

Стыхіра з Ютрані:

Адам быў выгнаны з раю, бо пакаштаваў забароненага плоду. Майсей стаў багавідцам пасьля таго, як ачысьціў сябе пастом. Таму, калі жадаем быць жыхарамі раю, адвернемся ад некарысных страваў. Калі хочам бачыць Бога, як Майсей, распачнем саракадзённы пост. Вытрывалаю малітваю і гарачым маленьнем суцішым нашыя душэўныя хваляваньні, адгонім цялесныя пажаданьні. Тады лёгка ўзыдзем на вышыню, дзе хоры анёльскія славяць нязмоўна неразьдзельную Тройцу і аглядаюць невыказную красу Ўладара. І нас, Сыне Божы і Жыцьцядаўца, зрабі годнымі цешыцца разам з анёламі, бо на Цябе, Хрысьце, спадзяемся, малітвамі Тваёй Маці, апосталаў, мучанікаў і блаславёных.

Сустрэча Госпада нашага Ісуса Хрыста (2 лютага 2008г.)

Трапар(тон 1). Радуйся, Поўная ласкі Багародзіца Дзева,бо з Цябе зазьзяла Сонца праведнасьці – Хрыстос Бог наш, які прасьвятляе тых, што ў цемры. Весяліся і ты, праведны стары, успрыняўшы на рукі свае Вызваліцеля душ нашых, які дае нам уваскрасеньне.

Кандак(тон 1). Улоньне дзявочае Ты асьвяціў і рукі Сямёнавы блаславіў, як належала; і цяпер, апярэдзіўшы нас, Ты дараваў нам збаўленьне, Хрысьце Божа. Захавай у супакоі Царкву Тваю і ўмацуй усіх у любові Тваёй, адзіны Чалавекалюбца.