Семінар для панамароў

У суботу, 5 красавіка, у нашай парафіі адбыўся семінар для панамароў Алтарнага брацтва. У ім узялі ўдзел 10 служкаў з парафіяў г. Менску. Адказным за падрыхтоўку і правядзеньне семінару быў а. Андрэй Буйніч.

Праграма семінару распачалася а 9 гадзіне раніцы Еўхарыстыяй і была вельмі насычанай. Удзельнікі праслухалі тры лекцыі і актыўна працавалі падчас двух варштатаў. Лекцыі тычыліся трох асноўных тэмаў: “Духоўнае жыцьцё”, “Літургічнае жыцьцё”, “Асабістая малітва”.

Акрамя асноўнай праграмы былі перапынкі на тое, каб трошкі падсілкавацца. Гэтыя перапынкі панамары растаропна выкарасталі, каб пагутарыць і падзяліцца сваімі думкамі ў сяброўскай атмасферы.

Сустрэча Алтарнага Брацтва

У сераду, 23 студзеня б.г., у дзень памяці Пратулінскіх мучанікаў, адбылася сустрэча панамароў з Апостальскім Візітатарам для грэка-католікаў Беларусі а. архімандрытам Сяргеем (Гаекам). З духоўным навучаньнем да ўдзельнікаў зьвярнуўся а. Андрэй Буйніч, які зьяўляецца духоўным апекуном усіх панамароў. Пасьля адбылася размова з а. архімандрытам Сяргеям, які распавёў гісторыю Пратулінскіх мучанікаў і зьвярнуў увагу на значэньне іх прыкладу для духоўнасьці суполкі Алтарнага брацтва.

Па словах а. Андрэя Абламейкі, які зарганізаваў гэтае спатканьне, Алтарнае брацтва – гэта братэрская супольнасьць тых, што прыслугоўваюць на Боскай Літургіі. “Нас лучыць сам дух Боскай Літургіі і, перад усім, жаданьне служыць Хрысту, які рэальна прысутны ў Еўхарыстыі” – тлумачыць айцец Андрэй.