Нядзеля Самаранкі (20 красавіка)

У гэту нядзелю чытаем Евангельле пра сустрэчу Ісуса Хрыста з Самаранкай, якая вызнала Ісуса за Месію. Сьвяткуючы Пасху, працягваем асэнсоўваць месіянскую місію Хрыста і ягонага вучэньня як “жывой вады”, якое хто пакаштуе, той не будзе прагнуць давеку.

Згадваем памяць вялебнага Тодара Трыхіны (Валасяніцы). Гэты сьвяты нарадзіўся ў багатай сям'і ў Канстантынопалі. Жыў у V стагоддзі. У маладым веку стаў манахам у адным з манастыроў у Трацыі. Вёў вельмі аскетычнае жыцьцё. Ніколі не насіў абутку, не пакрываў галавы. Вопратку насіў з шорсткага матэрыялу, а замест сподняга адзеньня ўжываў валасяніцу.

21 красавіка

Сёньня сьвяткуем памяць сьвятамучаніка Януарыя і іншых разам зь ім пацярпелых мукі хрысьціянаў. Сьвяты Януары нарадзіўся каля 275 году. Быў біскупам Беневента (паўдзённая Італія). Падчас перасьледу хрысьціянаў за імператара Дыяклецыяна, наведваючы арыштаваных, быў сам арыштаваны. Пацярпеў катаваньні. 19 верасьня 305 году разам з іншымі хрысьціянамі быў засечаны мячом у Путэолі. З крывёй сьвятога, якая, паводле паданьня, была сабраная на месцы мучаніцтва, кожны год адбываюцца цуд. Кроў у гермэтычна запаяных сасудах (дзе яна перахоўваецца ў цьвёрдым стане) расплаўляецца і ператвараецца ў пеністую вадкасьць. Пакуль што ніякага навуковага тлумачэньня гэтай зьяве не было дадзена.

Таксама згадваецца памяць мучаніка Тодара Пергійскага. Гэтага маладога жаўнера ні намовамі, ні пагрозамі не змаглі змусіць скласьці ахвяру паганскім бажкам. Пасьля жахлівых катаваньняў ён быў павешаны на крыжы і памёр на трэці дзень сваіх мукаў.

На літургіі чытаньні Дз 12.12-17; Ян 8. 42-51

22 красавіка

Вялебнага Тодара з Сікеі, біскупа. Быў пустэльнікам, а потым, калі знайшоў спаўбратоў-манахаў, зарганізаваў манастыр. Быў выбраны біскупам Анастазіопаля, у Малой Азіі. Памёр у кляштары, да якога вярнуўся 22 красавіка 613 года.

23 красавіка

Вялікамучаніка і цудатворцы Юрыя Пераможцы. Паводле найбольш старажытнага жыція гэтага сьвятога, нарадзіўся ў другой палове ІІІ стагоддзя ў Кападокіі і памёр, сьведчачы Хрыста, у Палестыне, у горадзе Ліда. Служыў у войску, паволе розных варыянтаў жыція ці то ў легіёнах Дыяклецыяна, ці то выконваў функцыю трыбуна ў персідзкім войску. Быў замучаны за адмову складаць ахвяру паганскім бажкам каля 303 г. Раней быў шырока распаўсюджаны варыянт жыція, паводле якога сьвяты забівае цмока, які змушае людзей нейкага горада аддаваць яму на спажыву жыхароў гэтага горада. Тут адлюстроўваюцца пазьнейшыя алегарычныя напластаваньні, якія сімвалізуюць вызваленьне чалавецтва ад улады паганства моцай Хрыста.

Сьвята сьв. Юрыя зьяўляецца поліелейным з усяночным. Паводле літургічнай традыцыі службы Вячэрні і Ютрані спалучаюцца ўвечары напярэдадні сьвятаў у адну, якая называецца Ўсяночным чуваньнем, і адпраўляюцца асабліва ўрачыста.

Сёньня таксама сьвяткуем Адданьне паловы сьвята Вялікадня, падчас якога яшчэ раз паўтараюцца адпаведныя тэксты сьпеваў, прысьвечаных гэтаму сьвяту.

24 красавіка

Сёньня сьвяткуем памяць мучаніка Савы Страцілата. Ён паходзіў з готаў, быў адважным і руплівым салдатам і дайшоў да высокай пасады ў войску за імператарам Аўрэліянам. Быў як руплівым жаўнерам, так і руплівым хрысьціянінам. Наведваў хворых і ўвязьненых, меў дар ацаленьняў і выгнаньня нячыстых духаў. Калі імператар даведаўся, што начальнік ягонага войска хрысьціянін, ён зажадаў, каб Сава адрокся ад Хрыста. Але той адмовіўся, за што быў мучаны. Стаўся прыкладам для 70 ягоных калегаў, якія, бачачы ягоную вытрываласьць, вызналі сябе хрысьціянамі і былі засечаны мячом. Скончыў жыцьцё сьвяты мучанік у хвалях Тыбру, куды яго ўкінулі паганцы. Сьмерць мучанік прыняў у 272 годзе.

25 красавіка

Сьвятога апостала і евангеліста Марка, які быў стрыечным братам Варнавы, паходзіў з калена Левія. У Дз 12.12 сказана, што хрысьціяне зьбіраліся на малітву ў доме ягонай маткі. Навернены сьв. Пётрам каля 44 году, са сьв. Паўлам і Варнавай пашоў да Антыёхіі, а адтуль на Кіпр і да Памфіліі, потым вярнуўся да Ерусаліму. Спадарожнічаў Пятру на шляху да Рыму, служачы за перакладчыка. На просьбу рымскіх хрысьціянаў напісаў па-грэцку сваё Евангельле. Потым скіраваўся да Ягіпту, дзе прапаведваў Хрыста, стаўся заснавальнікам Царквы ў Александрыі. Каля 67 году пацярпеў за Хрыста сьмерць. Цела яго было перанесена з Александрыі і зараз знаходзіцца ў Венецыі. Сьвята апостала Марка поліялейнае. Гэта значыць, што адзначаецца асабліва ўрачыста, на Ютрані сьпяваюцца асаблівыя псальмы пра міласэрнасьць Бога, якія называюцца Поліялей. Таксама сьпяваецца Вялікае славаслоўе. На Вячэрні сьвята пасьля 103 псальма сьпяваецца першая катызма.

26 красавіка

Сьвятамучанік Васіль быў біскупам Амасіі, у Понце, на пачатку І V стагоддзя. Удзельнічаў у лакальных Сінодах у Анкіры і Неацэзарэі. Быў руплівым праціўнікам арыянства. У тую пару ўсходняй часткай імперыі кіраваў Ліцыній, каторы, хоць і падпісаў міланскі талеранцыйны эдыкт, але заставаўся паганцам, за часоў якога перасьлед хрысьціянаў яшчэ трываў. За вызнаньне Хрыста біскуп быў замучаны ў Нікамедыі каля 322 году.

На літургіі чытаньні Дз 15.35-41; Ян 10. 27-38