Нядзеля Ўсіх Сьвятых

Сёньня сьвяткуем Нядзелю Ўсіх Сьвятых, якая пачынае “звычайны час” ў Царкве. Пачынаецца стоўп Актоіха, а чытаньне Трыодзі адкладаецца. У гэты дзень Царква ўспамінае ўсіх сьвятых, якія жылі на зямлі, вядомых, праслаўленых Царквой, ці невядомых.

Увесь тыдзень сьпяваем на 8 тон. Чытаньне ютрані: Мц 28. 16-20

Чытаньні на літургіі: Габ 11.33-12.2; Мц 10. 32-33,37-38, 19.27-30

19 траўня

Сёньня пачатак Пятровага посту. Называецца таксама постам сьвятых Апосталаў (народная назва Пятроўка). Гэты пост ўважаецца за самы “малады” у царкоўнай літургічна-аскетычнай гісторыі. У некаторых рэгіёнах ён нават не ўваходзіў да сьпісу пастоў, у якія належыць спавядацца. Быў уведзены, каб надаць аскетычны характар чаканьню сьвята сьвятых Апосталаў Пятра і Паўла і заклікаць вернікаў да самаабмежаваньня пасьля досыць вольнага перыяду Пяцідзесятніцы. Літургічна (у Актоіху і Мінэі), у адрозьненьне ад Вялікага Посту, не адзначаецца. Гэты пост самы лагодны стасоўна аскетычных абмежаваньняў посту ў годзе.

Сьвятамучанік Патрык быў біскупам горада Пруса, непадалёк ад Мармуровага мора. Вядома, што памёр вызнаючы Хрыста.

Чытаньні на літургіі: Рым 2.28-3.18; Мц 6. 31-34, 7.9-11

20 траўня

Сьвяты Талалей з Лівануі быў лекарам і лекаваў задарма. Адмовіўся скласьці ахвяру паганскім бажкам, за што перанёс мукі. Ягоныя каты Аляксандр і Астэрый таксама вызналі веру ў Хрыста і былі пакараныя сьмерцю. Быў замучаны ў 284 годзе.

Чытаньні на літургіі: Рым 4.4-12; Мц 7. 15-21

21 траўня

*Сьв. роўнаапостальных Канстанціна і Алены. Сьвяты Канстанцін быў імператарам у 306-337 гадах. Быў тым, хто спыніў перасьлед хрысьціянства ў Рымскай імперыі Медыяланскім эдыктам у 313 годзе. Падчас валадараньня праводзіў палітыку падтрымкі Царквы. У 325 годзе склікаў І Усяленскі сабор, на якім былі вызначаныя асновы хрысьціянскай веры. Сьв. Канстанцін быў ахрышчаны перад сваёю сьмерцю. Ягоная маці, сьвятая Алена, вядомая тым, што знайшла Крыж, на якім цярпеў збаўчыя мукі Хрыстос.

Чытаньні на літургіі: Рым 4.13-25; Мц 7. 21-23

Ап.: Дз 26. 1-5, 12-20; Ян 10.1-9

22 траўня

Сёньня згадваецца мучанік Васіліск, сваяка вялікамучаніка сьв. Тодара Тырона. Разам з братамі св. Яўтропіям і Клеанікам (гл. 3 сакавіка) быў схоплены. Браты былі ўкрыжаваныя, а Васіліск пасаджаны ў вязніцу. Сьвяты прагнуў, каб ягоныя катаваньні былі ўвенчаны мучаніцтвам. Аднойчы ўва сьне яму зьявіўся Хрыстос, які сказаў, што скора Васіліск прыме мучаніцкую сьмерць. Ён папрасіўся ў турэмных вартавых, каб адпусьцілі разьвітацца са сваякамі. Яны дазволілі, за што былі пакараныя намесьнікам Аргыпам. А сьвятога пасьля вялікіх катаваньняў, засеклі мечам і кінулі ў мора.

Чытаньні на літургіі: Рым 5.10-16; Мц 8. 23-27