Айцец Пахом Кавалёў

Айцец Пахом (Павал) Кавалёў нарадзіўся 20 ліпеня 1970 году ў г. Менску ў сям’і Ніны і Васіля Кавалёвых. У 1977 годзе паступіў у 1-шы клас 131 сярэдняй школы г. Менска. Пасьля заканчэньня восьмага класа навучаўся ў 71-й Прафесійна-тэхнічнай вучэльні па сьпецыяльнасьці “аператар станкоў з праграмным кіраваньнем”. З 1986 году працаваў на Мінскім аўтамабільным заводзе.

З 1987 году – сябра маладзёвага таварыства “Талака”, у складзе якога браў удзел у шматлікіх акцыях. У гэты перыяд актыўна ўдзельнічаў у археалагічных раскопках, у Прыпяцкай экалагічнай вандроўцы, браў удзел у пастаноўках тэатра “Золак”.

У пачатку 1989 году пазнаёміўся з грэка-каталіцкім сьвятаром айцом Янам Матусевічам, які запрапанаваў прайсьці кароткі курс падрыхтоўкі да Хросту. 27 лістапада 1989 году прыняў Хрост і Мірапамазаньне з рук айца Яна Матусевіча. З 1990 году служыў у Савецкай Арміі ў Рызе.

У 1991 годзе паступіў у Вышэйшую духоўную семінарыю імя Альфонса Лігуоры аа. Рэдэмптарыстаў у Львове, якую скончыў у 1995 годзе. На пачатку 1996 году прыняў дыяканскія сьвячаньні з рук Найдастойнага Уладыкі Васіля Медвіта. 23 траўня 1996 году быў рукапакладзены на сьвятара Уладыкам Васілём Медвітам ў Сьвята-Усьпенскай Уніўскай Лаўры. Улетку таго ж году вярнуўся ў Беларусь, каб працаваць у Полацку ў грэка-каталіцкай парафіі Сьвятамучаніка Язафата. З 1996 па 2001 год быў душпастырам парафіяў у Віцебску, Магілёве, Гомелі. На пачатку 2001 году праводзіў сьвятыя Місіі ў часе Вялікага посту ў правінцыі Антарыо (Канада).

З сярэдзіны 2001 году па запрашэньні Украінскага Каталіцкага Універсітэта ( УКУ ) працаваў у духоўна-пастаральным аддзеле ў якасьці духоўніка для выкладчыкаў і студэнтаў УКУ. У гэты перыяд праводзіў таксама актыўную душпастырскую дзейнасьць у грэка-каталіцкіх парафіях УГКЦ у Львове і па-за яго межамі. На сёньняшні дзень мае душпастырскія абавязкі ў парафіях УГКЦ у Львове, часта прыязджае ў Беларусь, каб правесьці рэкалекцыі ў парафіях БГКЦ.